संवाददाता प्रखर छत्तीसगढ़ :- नवा रायपुर / सावन के पहिली तिहार हरेली ल आज पूरा छत्तीसगढ़ ह हर्ष उल्लास के साथ मनावत हे। नवा रायपुर स्थित मुख्यमंत्री निवास में मुख्यमंत्री विष्णु देव साय ह अपन पूरा कैबिनेट संग हरेली तिहार मनाईन। ए बेरा मंच म पूर्व मुख्यमंत्री डॉ. रमन सिंह घलोक मौजूद रहिन।
मुख्यमंत्री निवास के दुआर आज आम जनता बर घलोक खुला रखे गे रहिस। जम्मो अधिकारी-कर्मचारी अउ आम जनता हा मुख्यमंत्री निवास पहुंच के तिहार के बधई दीन। मंच ले मुख्यमंत्री ह कहिन – “हरेली तिहार के यही संदेश हे, हरियाली ले सुघ्घर हो अपन प्रदेश।” ए बेरा कृषि औजार नागर, गैंती, कुदारी के पूजा करे गीस अउ छत्तीसगढ़ के परंपरा ल जिंदा रखे के बात कहे गीस।
दूसर कोती –
कांग्रेस के वरिष्ठ नेता अउ पूर्व मुख्यमंत्री भूपेश बघेल ह घलोक अपन निवास म हरेली तिहार धूमधाम ले मनाईन। भूपेश बघेल ह गेड़ी चढ़ के सबो ल हरेली तिहार के गाड़ा-गाड़ा बधई दीन। उनकर पोस्टर म लिखे हे –
“नांगर, बइला, गैंती, रापा अउ कुदारी, हरेली तिहार म रंगे हे छत्तीसगढ़ महतारी”
आज दुनो पक्ष सत्ता हो चाहे विपक्ष, सबो हरेली के रंग म रंगे नजर आवत हें। गांव-गांव म गेड़ी, भौंरा, नागर पूजा अउ हरियाली के ए तिहार ह छत्तीसगढ़िया संस्कृति ल एक सूत्र म पिरोए हे।
